لا ادري

لا أدري

 !!!

ما كنت في يوم حاضره لديك

ومع ذالك

بقيت لدي احساس مختلف

لا ادري ولا اعلم شكلاً او اسماً له

ولكنه يؤلم احيانا

ويجعلني ابتسم احيانا

ويتركني لاشتاق كثيرا

لا ادري ولكني اشعر

نسرين

31/8/2011

:)

عفوا ... ليس حبا

عندما تراني اتذكر اشيائي معك

واردد كلماتي لك

وتراني لازلت اختار ذالك المشروب المفضل  لدينا

واشاهد الغروب من ذالك المكان المرتفع كما كنا نفعل

أَبتسم وانا اتخيل تلك الاحلام

واشتاق لنفس الاماكن

عفوا

ليس حباً

ولكن هذا هو عالمي الذي ادخلتك انا اليه

كذالك فانا لم أعود اشيائي واحلامي 

ان اتركها وحيده

:)

 نسرين

24/8/2011

12:10 am

افتتاحيـــــه :D

اممممم

بما اني افتتحت المدونه الجديده كدا سوكيتي

من غير هيصه ولا دي جي  ولا كهارب

ولا حتي فرعين نور سهاري

وبما اني برضو بمـــــــــــــــوت في الهيصه زي عنيا واكثر

ونزولا علي رغبه الجماهير في الطلب الملح جدا للموكا

قررت اعمل ليله لوجه الله هوزع فيها الرز بلبن والموكا للجيران والحبايب

وطبعا كل اللي جه وبارك هياخذ نصيبه ميقلقش

والله يسامح مدونه انكسر جوانا شئ

عشان هيا اللي فتحت عليا فتوحه من بعد ماطلبت الموكا

:D :D

 وده الموكا بالبند ق والكريمه مخصوص لـــ انكسر جوانا شئ

ملحوسه ... الموكا ده بالبندق مش بالكارميل عشان يمكن الكارميل مش بتعجبكم

;D

 

بالنسبه ليك يا رضوى

(طالبه مقهوره .. درجه اولى)

احنا اتفقنا انك صاحبه مكان مش ضيفه وعشان كدا ملكيش موكا

لكن هنفطر سوا عشان يبقي عيش وتدوين

:D

تيمو

ليك واحد موكا سخن بمناسبه الافتتاح

ومني لفريده مشروبي المفضل في الصيف واحد موكا ساقعه مثلجه

اممممم

الناس اللي شرفتني ومطلبتش حاجه بقي

انس

نهر الحب

مها

نورتوني بجد وبسطوني بوجودكم

وده مني لكم

لكم كلكم ولكل اللي جه ومسبش تعليق كمان

نورتوني

:D

نسرين

22/8/2011

الكاميرا الخفيه

برابراببا ... برابراببا

ده الصوت اللي كنت متخليه اني هسمعه في اي لحظه

والناس هتشاور ليا علي الكاميرا

وتحبي نذيع ولا منذعش

وانفخ البلانين يانجاتي

وجو زكيا زكريا ده

بس البني ادم الملزق اللي قدامي 

معملش حاجه من ده

وانا من جوايا هااا هيقول اهو ايون انا عارفه

ها فين البرابراببا بقي

هااا فين فين

!!!

طيب فلاش بااااك لورا كدا

من يومين كدا

ركبت مع بنت خالتي ميكروباص عادي جدا

كان معانا بيبيسي وبطاطس عادي برضو

قعدنا علي ثالث كرسي جنب بعض عادي برضو

الميكروباص عبي زباينه وطلع والناس بتلم الاجره عادي برضو

المش عادي بقي الاخ الملزق اللي كان قاعد قدامنا

مره واحده ادور ولف وبدأ يكلم بنت خالتي

ما لسه بدري علي السحور ياجميل

!!!

وبيقولها بصوت عالي جدا لدرجه الميكروباص كله كان سامع

والشباب فيه والرجاله مكلمهوش

وبعدين الولد شكله ابن ناس جداااا

وصاحبه برضو شكله ابن ناااس اكثر

يبقي بذمتكم مش دول بتوع الكاميرا الخفيه

!!!!

عملنا نفسنا مش واخذين بالنا

راااح مكمل ابن الناس المحترمين

متجيبي واحده بقي

!!!

الناس برضو ساكته

!!!

مهو الناس ده اما كاميرا خفيه

او فاهمين الجدعنه والرجوله انك تعمل عبيط

!!!

وانا وبنت خالتي بقينا ولا عادل امام في المولد

!!!

شويه والبني ادم ده

مد ايده وعايز ياخذ منها البطاطس

لا بقي

لغايه هنا وكفايه وذيع ياعم براحتك

بس من غير قله ادب بقي

بعد اذن حضرتك كدا مينفعش

_ احم ده كان صوت العبده لله _

علي اساس اني لما هطلع في التلافزيون اطلع بنت ناس برضو

حضرتك بتقولك حضرتك

هاااع هاااع هاااع

بتقولك حضرتك

الواد كان بيفرفر من الضحك

 وكأن كلمه حضرتك بتزغزغو

والناس برضو ساكته

!!!

فيه ايه ياجدعان

!!!

مفيش ثواني والبيه مد ايده فعلا

لا بقي مبدهاش

بلا بنت ناس بلا بنت بوابين

كله الا قله الادب

اااايه اللي انت بتعمله ده مينفعش كدا علي فكره

رااح مزعق ليا بصوت عاااالي جدا وقالي انتي تسكتي خااالص

وبيمد ايده عايز يضربني

قلت له انت مفكر نفسك ايه

قالي ههههش خاااالص

!!!

ان بني ادم محترم يرد ولا يتكلم ابدا

وانا مستنيه بقي البرابراببا هتنزل اهي

!!!

مفيش حاجه نزلت لا تتر ولا ناس بتسقف

فمبدهاش بقي

رحت مصوته علي جنب ياااااسطي

...

...

ركن السواق وكان بصراحه ابن حلال مصفي 

قالي فيه ايه يااانسه

طبعا الناس في الشارع اتلمت علي صويتي

وبنت خالتي بتدمع وانا مش مصدقه قلت له الولد ده وصاحبه بيضايقنا

السواق : ياجماعه استهدوا بالله

رد عليه البني ادم المستفز

قاله انا بعاكس صحبتها الحلوه

هيا مالها  

رد السواق خلاص ياكابتن

خلاص ياانسه

ورجع ركب وعلي القران

اسمعوا الشيخ بيقول ايه

!!!

وش كدا السواق  ده معهم في الكاميرا الخفيه بقي

مش محتاجه نصاحه ده

اهو باينه جدا

!!!

بس برضو انا متنحه وبنت خالتي بتعيط 

مش مسدقه الرجاله اللي في العربيه اللي مفتحوا بقهم بحاجه

!!!

 كل اللي فات ده بقي حماده واللي جاي ده حماده تااااني خالص  

الكتله اللي قدامي مش يخرص بقي وخلاص لا

بيقول لصاحبه ايه بقي الظريف

استني احرق لك دمها

وبعلو صوته في الميكروباص

هما البنات بيغيروا من بعض كدا ليه

تيجي تعاكس الحلوه الوحشه هيا اللي تكلم وتضايق

!!!

لا بقي

 انا وحشه ياااابن التيييييييييييييت

قليل الادب واعمي كمان

!!!

والناس ولاد ال ... سااكتين

والنعمه ده كاميرا خفيه

وحيات ابو اشرف ده كاميرا خفيه

بس انا مش هغلط برضو عشان المونتاج ميشيلش صوتي

ويحط التيييييييييييت بتاعتهم

!!!

وصلنا اخر الخط

الملزق الغتت بتاع تعاكس الحلوه الوحشه تضايق ده نزل

صاحبه مخرج البرنامج نزل

المونتج اللي كان قاعد جنبنا نزل

ومدير الاضاءه اللي كان قدام خالص نزل برضو

والبنات اللي بيعملوا المواثرات الصوتيه اللي علي الكنبه الاخيره

نزلوا برضو

السواق بطل العربيه ونزل هو كمان

وانا قاعده متنحه مش مصدقه

نسرين انتي مستنيه ايه ؟؟ 

كانت بنت خالتي بتسال ببرائه بعد مابطلت عياط

بصتلها وقلتلها هما مش هيسالونا طيب نحب نذيع ولا لا

!!!!

  

نسرين

18/8/2011

بسم الله وهنبدا الليله :)

امممم

هههههه

بصراحه مش عارفه اقول ايه

!!!

بس هما قالوا ليا اني لازم اقول حاجه افتتاحيه كدا يعني

امممم

طيب

الاول صباح الفل .. او مساء الجمال

حسب ما نورتوني

وببساطه كدا

مركب ورق

منكن تكون حاجه ببتدي بيها صفحه جديده

امممم

الحقيقه هو كتاب جديد في حياتي مش صفحه واحده
  
وبس

:D

اه كمان احب استغل المناسبه العظيمه ده

واعلن الموكا مشروبا رسميا للمدونه

(ساقعه مثلجه صيفا ... وسخنه مولعه شتاءا)

:D

  قلبي انا ... مركب ورق

نسرين                                          

18 / 8 / 2011