البنت المدهوله
مرحله عمريه بتمر بيها اي بنت
بشرط واحد
متكونش دخلت مدارس في القاهره
البنت المدهوله مش مقصود بيها
البنت الواقعه
ولا البنت اللي بتحب علي نفسها
المقصود بيها البنت اللي متعرفش حقيقه الدنيا من حوليها
في الحقيقه لو بصيت عليها هتلاقي تشابه كبير قوي
بينها وبين قصه الفيلم نيمو
في الغالب هيا تطابق شخصيه نيمو
اللي ميعرفش عن العالم الخارجي غير من حكاوي ابوه
لكن الواقع بيخليها تعيش دور مرهف
السمكه البهلوان
والد نيمو
اللي دفعته الظروف انه يخرج للمحيط المخيف
ويقابل اسماك القرش
والسلاحف المعمره
ودوري السمكه المسطوله بس طيبه
***
في الغالب البنات المدهولين اللي قابلتهم
بيشتركوا في مجموعه صفات
الي حد كبير بتفكرني بنفسي
وده بيقودنيي في الاخر اني اعترف
انه من سنين مش بعيده قوي
كنت واحده من المدهولين علي عينهم دول
***
المهم بقي نرجع للصفات المشتركه
اهم صفه زي ماقلنا انهم مدخلوش مدارس في القاهره
في الغالب هما من ارياف او جاين من السعوديه
كمان من السمات المشتركه
انه كل حاجه اما تندرج تحت بند عيب او حرام
وده بسبب البيئه اللي نشأت فيها
وكانت اكبر المحرمات اللي منكن تمارسها البنت المدهوله
انها ترد السلام علي زميل ليها
وتبقي خايفه يكون حد من اصحابها لاحظ الخطيئه
البنت المدهوله بتبقي مركزه مع فيلم سندريلا قوي
وشايفه العالم وردي
وان الناس كلهم نيتهم طيبه
وان الافلام والمسلسلات العربي
عمرها ماتكون قصص حقيقيه
كلها افلام من وحي الخيال
والحقيقه الوحيده
موجوده في افلام ديزني
***
غاليا في سنه اولي جامعه بتلاقي المدهولين
اتلموا علي بعض
واتعرفوا بانهم شله من الدحيحه
السذج
اللي مش بيرضوا يغششوا حد
كل كلام الشله ده عمره ابدا مايخرج خارج نطاق الدراسه
اطلاقا
الا في حالات نادره
وقتها منكن هتلاقيهم بيتكلموا في الطبخ
نظرتهم عن مرتديات البنطلون
انها بنت منحله
وقلييله التربيه
وانها بتلبس البنطلون لاغراض عيب
افتكر وانا في ثانيه كليه
كنت ابتديت البس بنطلونات كتير
لاني كنت برتاح فيها
وانا نازله وطالعه من المواصلات
ولاسباب كتير تانيه
ويعلم الله اني وقتها كنت بلبس علي البنطلون
حاجه طويله عمرها مكانت فوق الركبه ابدا ابدا
يعني الي حد ما معتبرش فاسقه قوي
الا ان مجموعه البنات ده
خرجوني من مجموعتهم ورفضوا اني اكمل معاهم البحث
اللي كنا بنعمله سوا
وقالوا ليا بالعربي كدا
دوري علي مجموعه تانيه تشتغلي معاها
ولما قعدت ادور علي السبب
واحده منهم حبت ترجعني عن الطريق اللي انا ابتديت امشي فيه
وقالت ليا
عشان طريقه لبسك وحشه قوي
وانت عارفه احنا مش بنحب حد من صحابنا يلبس بنطلون
***
من الحجات المميزه كمان
ان نمره تليفونها
عوره
واسمها عوره
رقم جلوسها
عوره
كشكولها
خط احمر
من السكن للجامعه ومن الجامعه للسكن
يعني والله لو قعدت في اكتوبر ده مش خمس سنين ... ستين سنه
مـ هتعرف عن مول العرب ده
غير اسمه
بنات بالسذاجه ده
والطيبه ده
بتلاقي اهلها رموها في وسط المحيط
وسبوها
طبعا لانهم بيثقوا فيها
وهيا بكل جداره تستاهل الثقه ده فعلا
واهل لحمل امانه اهلها
وبنت تشرف
ومتفوقه ويمكن كمان من اوائل دفعتها
لكن
للاسف
منكن ينضحك عليها بسهوله
في الغالب مش علاقات عاطفيه الا نادرا
لانه غالبا البنت ده مش بتسمح بعلاقه خارج نطاق
دبله في اليمين او الشمال
لكن بينضحك عليها في الحياه عامتا
متقدرش تعمل حاجه الا لو حد قالها المفروض هتعمل ايه
تقدر تتصرف كويس قوي في امتحان الفزيا لو نسيت قانون
لكن لو اتسرقت شنطتها في محطه مصر
متعرفش تعمل ايه
منكن تعيط لغايه مـ حد ياخذ باله منها ويرشدها المفروض تعمل ايه
تقدر تبص لزميلها من فوق لتحت كويس قوي
لو اطر يقعد في اخر البنش اللي هيا قاعده عليه
لكن لو واحد ضايقها في المواصلات
تشيل في نفسها وتروح تعيط
وتتجوز البنت ده راجل كويس
في الغالب اهلها اللي مختارينه
وتنتقل مسؤوليه الارشاد من الاهل ودكتور الجامعه الي الزوج
تحمل وتخلف
بنت مدهوله
***
معرفش
المشكله هنا عند البنت
ولا عند الام اللي في الاصل كانت برضو مدهوله
من يومين
شفت اثنين اخوات من العينه ده
عايشين لوحدهم والاهل كالغالب مسافرين
واحده فيهم واضح انها بتعاني من اعراض
التهاب رئوي
وبقالها اربع او خمس ايام
واختها بتديها دوا لانتفاخ البطن
مع انهم هما الاثنين بيدرسوا صيدله
مش مطلوب منهم ابدا يشخصوا المرض
ولا يكتبوا الدوا الصح
لكن
مطلوب انهم يفهموا انه بعد مرور 3 ايام
والحراره بتزيد
انهم يكشفوا عند دكتور
انهم يسالوا حد من دكاترهم في الجامعه
يتصرفوا لانه فيه حاجه غلط
***
فكرت انه ليه واحنا بندرس المواد العلميه
ليه ميكونش مقرر علينا كل سنه
علي الاقل ماده واحده عن الحياه
يدرسها لينا دكاتره في علم الاجتماع بطريقه حقيقه مش نظريه
وكل محاضره يتفتح باب النقاش في الحياه
والمواقف اللي بتحصل لنا
نتعلم انه لازم منكش معتمدين دايما علي شخص تاني
زي الاهل وبعدين الزوج
نتعلم قيم ومبادي دينا ومجتمعنا
ايه الطرق الصحيه في تعامل البنت مع الولد
لاننا اصلا في مجتمع مختلط
الواقع عندنا اما بتلاقي العلاقات مفتوحه بشكل مرضي
او مغلقه بشكل مرضي
نادرا متلاقي علاقات متوازنه
والماده يكون النجاح او الرسوب فيها مش معتمد علي الامتحان ابدا
عشان سهل انك تحفظ كام كلمه وتدخل تكتبهم علي الورق
لكن النجاح يعتمد علي التفاعل والدخول في نقاش في المحاضرات
منها تضمن الحضور والاهم تضمن تفاعل الطلبه
عن طريق التقيم الدوري
حاجه اخيره
مش قصدي اني اعيب في البنات دول ابدا
لانهم في الغالب احسن مني اخلاقا وتفوق دراسي
لكن من حقي وحقهم ان حد يعلمنا الحياه ده عامله ازي
وان فيها كذابين وغدارين زي مافيها طبين وكويسين
وانه لازم نبقي اقويا
حد يعلمنا ان الموقف متكسرناش
كنت محتاجه في يوم من الايام حد يعلمني
(اني اهم حد في حياتي )
قبل مالحياه تعلمهالي بطريقتها البشعه
الامضاء
بنت مدهوله سابقا
نسرين
25/12/2012
