الظاهره زيزو

الظاهره زيزو

طلع الميني باص 

وفي ايده كيس اسود منفوخ 

وقف في الاول خالص ورفع ايده من غير مايتكلم 

لمده دقيقه تقريبا 

لغايه ماالناس خذت بالها وكله سكت وبص عليه 

وبدون مقدمات 

Ladies & gentlemen

your attention plz

my name is zezo 

i am from behera 

and lives in Cairo

 i have a Surprise for you 

it is amazing 

really it is magic 

every one will be need it 

every one want use it

every one ......

......

فضل عم زيزو يتكلم بالانجلشا اللي والله ماعرف اتكلمها زيه 

يجي قد عشر دقايق 

وقتها كلنا هنموت ونعرف ايه اللي في الكيس مهم قوووي كدا؟؟

يخلي عم زيزو الراجل الغلبان  يخرج عن صمته ويتكلم لغه الفرنجه

العجيب بقي 

ان الصمت كان يتجلي في ابهي حلله 

:D

ده لو كنت رميت دبوس في الميني باص من غير مبالغه كنت هسمع صوته 

الكل فعلا مركز

...

..

.

 قدرنا نتعرف علي جزء من حياه عم زيزو

بعد العشر دقايق من المصطلحات الانجلشا صحيحه النطق 

وزي فقره الساحر بالظبط 

لما بيطلع الحمامه من كوم الجاكته

وبشويه مؤثرات صوتيه من عينه 

جلا جلا .. جلا جلا 

علي شويه حركات بهلوانيه 

تحسسك انه هيطلع قنبله تفرقع في وشك من الكيس

طلع عم زيزو كيس منديل ابو نص جنيه من الكيس الاسود

ورفعه لفوق مع علامه النصر بايده التانيه 

!!!

مش هتكلم علي الضحك الجماعي والهستيري اللي دار وقتها 

لكن هقول انه مفيش واحد في الميني باص الا واشتري من زيزو علي الاقل اربع اكياس مناديل 

***

بعدها بفتره حلوه كدا 

في المترو 

في عربيه السيدات 

ركبت ست شبه اللي بيضربو الودع دول 

وعامله الوشم الصعيدي في وشها 

تقريبا عندها 50 سنه 

وقفت في اول العربيه 

وبدات تغني زي البدو 

صوتها كان قوي وحلو جدا 

في الاول عشان الاصوات كانت عاليه فكرنها خناقه 

 من بتوع ياكابتشن ده عربيه سيدات 

وانت ترضي علي اوختك كدا 

والحوارات ده 

بس لما الناس لقو واحده بتغني بداو يسكتو ويبصوا 

وهيا بتغني قربت من اول كرسي 

وحطت ايدها علي كتف الست اللي قاعده وسالتها اسم ابنك ايه ؟؟

قالت احمد

راحت مغنيه اغنيه لـ احمد زينه الشباب 

الست اتبسطت قوي 

الغجريه كملت وسالت ست تانيه اسم بنتك ايه؟؟

علا 

راحت مغنيه لــ علا ست العرايس اغنيه حلوه برضو 

كل ده بسرعه مكنتش بتفكر 

شويه وبطلت غني 

كان عدي يجي محطتين مترو 

وراحت برضو مطلعه كيس مناديل 

وبدات تغني للمناديل 

هو ايه حكايه المناديل معاهم ؟؟

:D 

وكل ماواحده تشتري منها كيس تقولها اسمك ايه 

او اسم ابنك بنتك

وتغني اغنيه علي الاسم حلوه جدا 

والجميل انها مكنتش بترضي تاخذ غير النص جنيه حق كيس المناديل 

لما حد كان يجي يديها حاجه زياده 

ترجعها بطريقه حلوه وتغني وتقول 

كيف ماربي رزقك ربي رزقني 

اعتقد برضو ان العربيه كلها اشترت منها 

نزلت انا محطتي 

بعد فتره كبيره وهيا لسه بتبيع في نفس العربيه 

***

بصراحه

 انا مش بحب اشتري مناديل

 من الناس اللي بترمي الحاجه في حجرك وتطلع تجري ده 

 !! معرفش ليه 

بس مع الاثنين دول 

كان عندي استعداد اشتري باللي معايا كله مناديل 

مش عشان المناديل 

ولا عشان الاغاني والانجلشا عجبتني 

وانما تقديسا للابداع والتفكير

اصل فيه في البلد كام مليون واحد بياع مناديل؟؟

لكن مفيش كتير زي زيزو والحاجه سناء 

اللي قررو يبيعوا مناديل برضو بس بطريقتهم

(علي فكره انا معرفش اسمها بس شكلها ادي معايا علي سناء )

:D

وانا كـ واحده باحبط ساعات كتير من الصيدله 

احب اقول لنفسي وزملائي المحبطين الاعزاء 

فيه يجي 14 الف طالب صيدله بيتخرج سنويا 

لكن برضو منكن نكون مختلفين 

بحبه صغننه من التفكير 

والابداع 

زيزو وسناء مهماش احسن مننا يعني 

:D

نسرين 

المجد كل المجد للمناديل و الامخاخ النظيفه

23/12/2012