كل واحد بطل قصتة
اكثر حاجه منكن تفرسني لما حد يقول لحد
ياعم هو اللي عندك ده مشاكل
!!!
انا شخصيا الكلمه ده اتقالت ليا كتير
ومن باب العلم بالشئ انا مش بتكلم عن نفسي في البوست ده
وانما عن وضع عام انا كـ نسرين بتفرس منه
تلاقي ياعيني واحد في عز مشاكله بيشتكي لحد قريب منه
يقوم التاني يقوله
ياعم احمد ربنا انت احسن من غيرك
او يقوله
هو اللي عندك ده مشكله روح شوف الناس وبلاويها
انا مش ضد انه يصبره وانه يفكره بـ ابتلائات ربنا لغيره
عشان يحسسه قد ايه ربنا رفع عنه ابتلائات مكنش هيتحملها
لكن
قبل ماتوعظ غيرك
افتكر انه
اوقات كتير لما بنشتكي
مش بيبقي الهدف هو الشكوي
انما بيبقي نفسنا نرمي شويه من فوق كتافنا
وكمان في الغالب عند البنات لما بتشتكي
مش بتبقي بدور علي حل للمشكله
انما بتبقي محتاجه حد يسمع
حد يقدر
مش محتاجه كمان تعاطف وكلام اللي من عينه
ياحرام وياعيني
ده انت مسكينه او ضحيه
لا خالص
كل الحكايه
انه لما حد بيشتكي
بيبقي محتاج حد يسمع
حد يهز راسه وهو بيتكلم
مش اكثر ولا اقل
ومش معني كدا انه حابب دور الضحيه
او عايز يعيش الماساه
ولا معناه برضو انه معترض علي قضاء ربنا
انما ده فطره في البني ادمين
انهم يحتاجو لحد يسمع منهم بس
ولو الكلمتين دول هتموت وتقولهم
صدقني هتلاقي الوقت المناسب ليهم
ده لو قصدك فعلا انك تساعده
حاجه اخيره
لو حد جه يحكيلك حاجه مضايقه
اعرف وقتها انه بيثق فيك وبيرتاح معاك قوي
فمتخسرهوش
كمان لازم تفهم انه كل واحد بطل قصته
وبطل احداثها
يعني مينفعش تنصب نفسك مُعلم عليه
وتقول انا لو مكانك
عشان انت مش في مكانه
وربنا محطكش في مكانه
يمكن عشان مكنتش هتستحمل اللي هو فيه
فياريت لو لقيت حد محتاج يرمي شويه من همومه عندك
تسيبه
اصلها مش هتلزق فيك يعني
واعرف انه ربنا باعت لك معاه رساله
وبيقولك
انه جه الوقت اللي هيستخدمك فيه عشان تشيل شويه
عن عبد من عباده
ربنا عايز يقولك انه كرمك ورفع عنك حجات كتير غيرك تعبان منها
وانه اختارك انت عشان يرحم بيك عباده
فمتضيعش ثواب ربنا جابه لغايه عندك
نسرين
ارحم غيرك ربنا يرحمك
10/12/2012
0 comments:
Post a Comment