حاله

هناك فرق بين حبك لحالة الحب 

وبين انك تكون حقيقي بتحب 

فرق بين السما والارض
...

..

.

نسرين 
وشكلي بجد كنت مجرد حاله 
:)

21/4/2013

هتمنى له الخير _ انغام 

حضن !!

متعرفش تلم كراكيبي كدا 

فـ حضنك 

!!

نسرين 
اكيد للبعتره اخر 
:)
16/4/2013

وحشاني بلادي _ كارول سماحه 

حواديت

جوايا فضا

يساع حواديت كل الناس 

 بس ضاق بيا انا 

نسرين 

زحمه من جوه 

10/4/2013

حواديت _ منير

إسود الليل

الوطن ليس اسم يكتب في بطاقه الهويه 

وليس  الجواب الذي امنحه لـ كل من سألني عن الجنسيه 

فانت كنت لي يوماً وطنْ

ولم يُكتب اسمك في هويتي 

هي كانت لي ارضاً 

ولم أُمنح الجنسيه 

كل شئ كان يَنزع من روحي شئ 

ليصبح جزء من الوطن 

ذكرياتنا هي الوطن الحقيقي 

وطنا لم يُفرض علينا بل اخترناه وصنعناه 

ذكرياتنا هي الهويه 

نسرين 
لا تغرب احد رآك وطناً
واعد لي الارض كي استريح 
10/4/2013

اسود الليل _ جوليا بطرس 

اكبر الخيانات

اللي خذلك مرة 

معندوش مشكله انه يخذلك الف مرة بعد كدا 

عشان كدا متستناش منه حاجه 

والا هتبقي انت اللي بتخذل نفسك 

نسرين 
1/4/2013
اكبر الخيانات هي الخذلان 

ذاكره جسد _ احلام مستغانمي 

ترانزيت

انا قلبي مش صاله للترانزيت 

انا رحلة كامله علي فكره 

يعني من الاول للاخر 

Nesreen:)

16/3/2013

حاول ومتفترضش

حاجات قليله جدا في حياتنا 

تستاهل اننا نعمل اكثر من فرض الاحتمالات 

تستاهل اننا نجرب نحاول 

:)

نسرين 

go on if you want 

17/2/2013

بعاد

الناس اللي بتسافر في الفضاء 

كل ما بتبعد عن الارض

الحجات الصغيره الاول بتختفي 

وبعدين الاكبر فالاكبر 

لغايه ما كل حاجه تبعد 

ويفضل في الاخر شكل الكره الارضيه من بعيد 

وبس

نسرين 

17/2/2013

سفر

قصصي تبدا دائما وتنتهي عنده 

المطار 

حيث تشتم وتلمس الغياب 

نسرين 

هنا الكويت 

on the third day

5/2/2013

هتعمل ايه ؟

مواقف قليله في الحياه منكن تخليك 

تقرر اللعب بدون نزاهه او مبادي 

صعبه قوي اللحظات ده 

لو ملعبتش هتموت ولو لعبت هتموت جواك حجات 

لو مكاني هتعمل ايه ؟

نسرين 

:"(

2/2/2013

حاجه جوايا

نفسي لما حد يسالني 

عامله ايه ؟

مخفش اقول الحقيقه 

نسرين 
:)
28/1/2013

متخفيش

نفسي في حد يقولي 

"انا هنا متخفيش "

نسرين 

24/1/2013

7:40 am

هرتله وكدا يعني

هو ليه زراير الكيبورد مش مترتبه ؟

لا انجليزي ولا عربي ؟

ايه الفكره يعني 

!!!

ليه لما قلت للبنت اللي جنبي ببساطه انه معنديش فيس بوك

شهقت وجحظت العينان ... حسستني اني مش طبعيه ؟
ولما حبيت ارد لها الموقف 
سالتها عندك بلوجر 
قالت ايه؟
رفعتلها حاجب ونزلت التاني 
ورجعت لورا شويه كدا 
وبشهقه قلت لها ياه متعرفيش البلوجر
وابتسمتلها سعتها في شماته 

اصل ليه لازم اعرف مواعيد الدرس من الفيس يعني

!!

وليه العرب بتحلي ليهم شتيمه بعض تحت اي فديو علي اليوتيوب

انا مره سبت الفديو اللي بتفرج عليه

وقعتد ادور علي هما ليه بيتخانقو ؟

!!

وليه كل مااعترض علي اي حاجه

ماما تقولي عيييب انت بنت 

لا مفهمتكيش انا كدا 
!!!

ليه عقارب الساعه اسمها عقارب

مسموهاش فيله ليه يعني ؟

انا قررت لما اسئل حد هقوله

هو الفيل الصغير علي كام

والفيل الكبير علي كام

:D
بكيفي بقي 

ليه احلام مستغانمي

حاطه نقرها من نقر الرجاله

مع ان ربنا مقلش عليهم

ان كيدهم عظيم

!!!

يااحلام الرجاله مهما كانو عايزين ضرب النار غلابه برضو

فخفي عليهم شويه

عشان اللي بتعمليه ده انا فهماه كويس قووي

;D

ليه فيه ناس غاويه تستفزني

لله في لله

مع اني لو حطيتهم في دماغي

هكلهم والمصحف

!!!

ليه ماما بتزعقلي لما بتفرج علي جراندايز

ايه مشكلتها مع جراندايز يعني ؟

نفسي افهم

!!

ليه انا اخذ الاوده اللي جوه واخويا ياخذ الاوده اللي بره ؟

_ايه التفرقه العنصريه ده _

ليه كل ام بتقعد تقول

بنتي عمرها متعمل كدا

وبنتها بتعمل البدع اصلا

:D

ايه العبط ده

انا لما هبقي ام عمري مهقول كدا

ليه اي كتابه لكاتب معروف 
لازم تعجبني وتبقي واو 
معادي يعني 
والدنيا اذواق 
ايه حكر الفكر ده ياربي 

ليه الناس اللي ساكنين في مدينه نصر فاكرين نفسهم ولاد ناس

والناس اللي ساكنه في عين شمس المفروض انهم ولاد تييت

 مع اني ساكنه في عين شمس مبعضش وادي علي بنت ناس عادي يعني

!!!

وليه لما حد يسمع اغاني قديمه يبقي ضروري بيحب جديد

ايه الهطل ده

!!!

ليه باسم يوسف بقي يافور قوي كدا

مكان حلو

!!!

بالمناسبه بقي

ليه الاخوان سايبين اللي اسمه صبحي صالح يستفز الناس بالغباء كدا

بجد ليه يعني

!!!

ليه اي حد بيصلي

يبقي متدين

طب منا اعرف ناس حافظين القران

ولا هما متدين ولا بتاع

زيهم زي الحمار شايل حموله غاليه ولا هو عارف فيها ايه اصلا

ومش بالضروره يعني ان كل بنت مش محجبه او بتلبس بنطلون

تبقي منحله وماشيه علي حل شعرها

ايه الاستفزاز ده بجد

!!!

ليه البنات بتنفسن من بعض ؟

وليه الولد من دول

يعجب بزميلته في الشغل وشجاعتها وطموحها

وهو مش بيرضي يخلي مراته تشتغل

انا اعرف واحد بيحب البنات اللي بيسوقو عربيات

بس مبيرضاش ان خطيبته تسوق عربيه

ايه التناقض الشنيع ده ؟

ليه بيقولو علي الشعب المصري شعب فرفوش

مع اني لما حاولت من ايام اشوف عدد الناس اللي ماشين في الشارع

ومبتسمين

ملقتش حد

الشعب المصري كله مكتئب

_بشرطين : يكون ماشي لوحده وميكونش بيتكلم في التليفون_

ليه الام لما بتتفق علي جهاز بنتها

الا ولزمن يبقي فيه انتريه وصالون

!!!

ليه لازم الاثنين يعني ؟

وليه لازم الثلاجه تبقي كريازي

اشمعني كريازي يعني ؟؟

لو مش كريازي مش هتسقع مثلا او هتقول والله منا شغاله يعني

انا عن نفسي لا هجيب صالون ولا هجيب كريازي

ليه كل مااطب من نهي تيجي القاهره

تتحجج بحجات عبيطه

ليه يانهي ليه ها ليه

ده انتي فقعتيني بصراحه

!!!

ليه كل مااركب مواصله وانا بقرا كتاب

القي اللي جنبي حاشر راسه جوه الكتاب

انت مالك ومال كتابي

ايه ده بجد

!!!

وسعات الموضوع بيتطور انه منكن يطلب الكتاب

وفي احسن الاحوال يسالني اسم الكتاب ايه

قال الواد مثقف قوي 
حوش ياخويا الثقافه اللي بتنقط 

!!!

اشمعنا فيروز يعني اللي بيحبها درويش

طب منا هنا اهو

:D

تفرق في ايه فيروز عني يعني ولامواخذه

:D

 ليه فيه اسئله معنديش الشجاعه اني اكتبها

يمكن خايفه علي اشاعير ناس

ياااه قد ايه انت عظيمه يابت يانسرين 

:D

اخيرا بقي

انت ليه وصلت في القراءه لغايه هنا

ياصبرك وفضوتك ياشيخ

:D

(أني بهرج معاك)

:D 

نسرين 

وانا في قمه الاستفزاز 

24/1/2013

عزف منفرد ...

القرارات الحياديه 

والرمادي  اهم معالم للشخصيه 

نعم غير واضحه ولا ليست قويه بل متخاذله متراجعه 

كل هذا يجعنا صيدا سهل السيطره عليه وعلي افكاره 

عمله سهله التداول في نظريه المؤامره 

مثله مثل الكثيرين 

ليست له احلام خاصه به لانه ببساطه تائهه في حلم شخص اخر 

او وسيله لتحقيق جزء صغير من حلم الاخر 

من الافضل له دائما ان ياتي الفعل ورده الفعل احيانا من الطرف الاخر 

وهو فقط ينتظر 

كي لا يلوم نفسه ان تالم مستقبلا 

فهو لن يقدم علي اتخاذ اي قرار 

ما هو الا نتيجه قرارات الطرف الاخر دائما 

فوجود من يلقي عليه لوم عذاباته وماسيه شئ مريح نفسيا 

ان يكون الاخر هو المتحرك والمفكر والمتخذ للقرارات المصيريه شئ مريح 

فهو في النهايه سيجعله الشماعه المثاليه التي يعلق عليها كل ملا يعجبه 

***

من المفيد احيانا اتخاذ القرار حتي وان كان خاطئ 

حتي لا نكون جزء من عزف الاخرين 

وتكون لنا نوته منفرده تحمل توقيعنا  

نسرين 

19/1/2013

اولئك الذين عبرو

الي اولئك الذين لولا رحيلهم

بحسن نيه او بسوء نيه 

لم اكن انا الان

شكرا لكم جميعا 

:")

"اصحاب الاهداء "

اؤلئك الذين عبرو ومرو من هنا 

لقد احببت في كل منهم شئ مختلف 

ومع ذلك في الغالب لم يكن مرورهم مرور الكرام 

فخلفهم كان هناك الكثير والكثير من المخلفات السيئه 

شئت ام ابيت 

كانت اجزاء من روحي تسقط عند كلا منهم 

في يوما ما بكيت بين ايدهم 

في يوم من الايام رسمو بسمه علي وجهي 

في يوما ما كانو هنا 

شئت ام ابيت

لهم ولتجاربهم الفضل الكثير لما انا فيه الان

 اذن مرورهم سيبقي حقيقه ثابته 

اذن لانزع عن قلبي الكرهيه والنقمه 

***

الان

لم اعد املك المزيد من الوقت للماضي 

ابتسم ان سمعت عن احدهم خبرا سعيدا 

وابكي اذا كان الخبر سئ

وادعي لهم كثيرا ان تذكرتهم

ليس هذا جنون ولا حب 

وليس فضلا مني 

ولا خلق زائد ولا عبط 

اعتقد انها بدايات مراحل الشفاء 

نسرين 

اللهم اسعدهم اينما كانو 

:")

6/1/2013

كل سنه وانا فرحه لقلبك

كلها يوم والسنه الجديده هتبتدي 

ولسه مش عارفه لك طريق 

ينفع كدا يعني 

:)

كل سنه وانا فرحه لقلبك 

كل سنه وانت طيب 

نسرين 

تصبح علي خير ;)

30/12/2012

مقدسات

مقدسات لها حُرمتها 

حتي الشئ التافه اذا انتزع منك

اصبح مطلباً مقدس 

فكيف الحال مع ماهو مقدس في أصله؟؟

نسرين

:")

27/12/2012

البنات المدهوله

البنت المدهوله

مرحله عمريه بتمر بيها اي بنت 

بشرط واحد 

متكونش دخلت مدارس في القاهره

البنت المدهوله مش مقصود بيها 

البنت الواقعه 

ولا البنت اللي بتحب علي نفسها 

المقصود بيها البنت اللي متعرفش حقيقه الدنيا من حوليها 

في الحقيقه لو بصيت عليها هتلاقي تشابه كبير قوي 

بينها وبين قصه الفيلم نيمو 

في الغالب هيا تطابق شخصيه نيمو 

اللي ميعرفش عن العالم الخارجي غير من حكاوي ابوه 

لكن الواقع بيخليها تعيش دور مرهف 

السمكه البهلوان

والد نيمو 

اللي دفعته الظروف انه يخرج للمحيط المخيف 

ويقابل اسماك القرش 

والسلاحف المعمره 

ودوري السمكه المسطوله بس طيبه

***

في الغالب البنات المدهولين اللي قابلتهم 

بيشتركوا في مجموعه صفات 

الي حد كبير بتفكرني بنفسي 

وده بيقودنيي في الاخر اني اعترف 

انه من سنين مش بعيده قوي

كنت واحده من المدهولين علي عينهم دول 

***

المهم بقي نرجع للصفات المشتركه 

اهم صفه زي ماقلنا انهم مدخلوش مدارس في القاهره 

في الغالب هما من ارياف او جاين من السعوديه 

كمان من السمات المشتركه 

انه كل حاجه اما تندرج تحت بند عيب او حرام 

وده بسبب البيئه اللي نشأت فيها 

وكانت اكبر المحرمات اللي منكن تمارسها البنت المدهوله 

انها ترد السلام علي زميل ليها 

وتبقي خايفه يكون حد من اصحابها لاحظ الخطيئه 

البنت المدهوله بتبقي مركزه مع فيلم سندريلا قوي 

وشايفه العالم وردي 

وان الناس كلهم نيتهم طيبه 

وان الافلام والمسلسلات العربي 

عمرها ماتكون قصص حقيقيه 

كلها افلام من وحي الخيال 

والحقيقه الوحيده 

موجوده في افلام ديزني 

***

غاليا في سنه اولي جامعه بتلاقي المدهولين 

اتلموا علي بعض 

واتعرفوا بانهم شله من الدحيحه 

السذج 

اللي مش بيرضوا يغششوا حد 

كل كلام الشله ده عمره ابدا مايخرج خارج نطاق الدراسه 

اطلاقا 

الا في حالات نادره 

وقتها منكن هتلاقيهم بيتكلموا في الطبخ 

نظرتهم عن مرتديات البنطلون 

انها بنت منحله 

وقلييله التربيه 

وانها بتلبس البنطلون لاغراض عيب 

افتكر وانا في ثانيه كليه 

كنت ابتديت البس بنطلونات كتير 

لاني كنت برتاح فيها 

وانا  نازله وطالعه من المواصلات

ولاسباب كتير تانيه 

ويعلم الله اني وقتها كنت بلبس علي البنطلون 

حاجه طويله عمرها مكانت فوق الركبه ابدا ابدا 

يعني الي حد ما معتبرش فاسقه قوي 

الا ان مجموعه البنات ده 

خرجوني من مجموعتهم ورفضوا اني اكمل معاهم البحث 

اللي كنا بنعمله سوا 

وقالوا ليا بالعربي كدا 

دوري علي مجموعه تانيه تشتغلي معاها 

ولما قعدت ادور علي السبب 

واحده منهم حبت ترجعني عن الطريق اللي انا ابتديت امشي فيه 

وقالت ليا 

عشان طريقه لبسك وحشه قوي 

وانت عارفه احنا مش بنحب حد من صحابنا يلبس بنطلون

***

من الحجات المميزه كمان 

ان نمره تليفونها 

عوره 

واسمها عوره 

رقم جلوسها 

عوره 

كشكولها 

خط احمر 

من السكن للجامعه ومن الجامعه للسكن 

يعني والله لو قعدت في اكتوبر ده مش خمس سنين ... ستين سنه

مـ هتعرف عن مول العرب ده 

غير اسمه 

بنات بالسذاجه ده 

والطيبه ده 

بتلاقي اهلها رموها في وسط المحيط 

وسبوها 

طبعا لانهم بيثقوا فيها 

وهيا بكل جداره تستاهل الثقه ده فعلا 

واهل لحمل امانه اهلها 

وبنت تشرف 

ومتفوقه ويمكن كمان من اوائل دفعتها 

لكن 

للاسف 

منكن ينضحك عليها بسهوله 

 في الغالب مش علاقات عاطفيه الا نادرا

لانه غالبا البنت ده مش بتسمح بعلاقه خارج نطاق 

دبله في اليمين او الشمال 

لكن بينضحك عليها في الحياه عامتا 

متقدرش تعمل حاجه الا لو حد قالها المفروض هتعمل ايه 

تقدر تتصرف كويس قوي في امتحان الفزيا لو نسيت قانون 

لكن لو اتسرقت شنطتها في محطه مصر 

  متعرفش تعمل ايه 

منكن تعيط لغايه مـ حد ياخذ باله منها ويرشدها المفروض تعمل ايه 

تقدر تبص لزميلها من فوق لتحت كويس قوي 

لو اطر يقعد في اخر البنش اللي هيا قاعده عليه 

لكن لو واحد ضايقها في المواصلات 

تشيل في نفسها وتروح تعيط 

وتتجوز البنت ده راجل كويس 

في الغالب اهلها اللي مختارينه 

وتنتقل مسؤوليه الارشاد من الاهل ودكتور الجامعه الي الزوج 

تحمل وتخلف

بنت مدهوله 

***

معرفش 

المشكله هنا عند البنت 

ولا عند الام اللي في الاصل كانت برضو مدهوله 

من يومين 

شفت اثنين اخوات من العينه ده 
عايشين لوحدهم والاهل كالغالب مسافرين 

واحده فيهم واضح انها بتعاني من اعراض 

التهاب رئوي 

وبقالها اربع او خمس ايام

واختها بتديها دوا لانتفاخ البطن

مع انهم هما الاثنين بيدرسوا صيدله

مش مطلوب منهم ابدا يشخصوا المرض 

ولا يكتبوا الدوا الصح

لكن 

مطلوب انهم يفهموا انه بعد مرور 3 ايام 

والحراره بتزيد 

انهم يكشفوا عند دكتور 

انهم يسالوا حد من دكاترهم في الجامعه 

يتصرفوا لانه فيه حاجه غلط 

***

فكرت انه ليه واحنا بندرس المواد العلميه 

ليه ميكونش مقرر علينا كل سنه 

علي الاقل ماده واحده عن الحياه

يدرسها لينا دكاتره في علم الاجتماع بطريقه حقيقه مش نظريه 

وكل محاضره يتفتح باب النقاش في الحياه 

والمواقف اللي بتحصل لنا 

نتعلم انه لازم منكش معتمدين دايما علي شخص تاني 

زي الاهل وبعدين الزوج 

نتعلم قيم ومبادي دينا ومجتمعنا 

ايه الطرق الصحيه في تعامل البنت مع الولد

لاننا اصلا في مجتمع مختلط 

الواقع عندنا اما بتلاقي العلاقات مفتوحه بشكل مرضي 

او مغلقه بشكل مرضي 

نادرا متلاقي علاقات متوازنه 

والماده يكون النجاح او الرسوب فيها مش معتمد علي الامتحان ابدا 

عشان سهل انك تحفظ كام كلمه وتدخل تكتبهم علي الورق 

لكن النجاح يعتمد علي التفاعل والدخول في نقاش في المحاضرات 

منها تضمن الحضور والاهم تضمن تفاعل الطلبه 

عن طريق التقيم الدوري

حاجه اخيره 

مش قصدي اني اعيب في البنات دول ابدا 

لانهم في الغالب احسن مني اخلاقا وتفوق دراسي 

لكن من حقي وحقهم ان حد يعلمنا الحياه ده عامله ازي 

وان فيها كذابين وغدارين زي مافيها طبين وكويسين 

وانه لازم نبقي اقويا 

حد يعلمنا ان الموقف متكسرناش 

كنت محتاجه في يوم من الايام حد يعلمني 

(اني اهم حد في حياتي )

قبل مالحياه تعلمهالي بطريقتها البشعه 

الامضاء 

بنت مدهوله سابقا 

نسرين 

25/12/2012

ولا شئ

لا شئ اريده منك

لا تخبرني بانك رجل 

فقط

دعني اكتشف ذلك بنفسي 

نسرين

15/12/2012

انا والشتاء نحبك

انا والشتاء ننتظرك 

انا والشتاء نحبك

انه وقت

اللقــاء

لـ شرب الشاي صباحا

وللكلام التافه الطويل اللذي لا ينتهي

من تحت انقاض الأغطيه ليلا

وعلي نافذتي بانفاسك

تكتب احبك 

انه وقتنا

انت وانا

رفيقان 

حبيبان

صديقان

وحدنا

والشتاء

نسرين

انا والشتاء ننتظرك 

انا والشتاء نحبك 

11/12/2012