واحد مشكل

واحد مشكل

نص كدا علي نص كدا

!!!

مفيش حاجه اسمها الفرصه الذهبيه

الفرحه اللي علي بعضها 

مفيش حزن كامل وخالص 

دايما فيه انصاف

نص حزن 

ونص فرحه

حاجه بتتمناها بتيجي في وقت انت مش عايزها 

ولما بتبقي هتموت عليها مش طايلها 

دايما فيه حاجه ناقصه 

عشان في الدنيا كمال الشئ نقصانه 

فمتقعدش تستني الفرحه المطلقه 

اللي تخليك مش مسدق نفسك 

عشان مفيش كدا 

ربنا بيعلمنا انه الكمال له وحده 

وبيبعت لنا الفرحه حتت 

واحنا احيانا بنبقي اغبيه 

بناجل انبساطنا لما الفرحه الكبيره توصل 

ويعدي العمر من غير ماننبسط 

عشان مفيش فرحه كبيره 

فلو في يوم لقيت حته فرحه صغننه متسبهاش 

اتنفسها بكل حاجه فيك

كلها بكل الجوع جواك
ومتسبهاش
 إلا لما تمصمص تفاصيلها الصغيره

ومتستسلمش للحزن 

لاني اكتشفت انه مفيش حزن كامل 

ولا فيش حزن اسود ومقفل علي صاحبه 

ربنا في وقت الحزن بيبعت لنا حجات 

تفرج شويه عننا 

فلو انت دوات حزين 

معلش 

هتعدي 

ودور علي رحمه ربنا في وسط حزنك 

هتلاقيها قريبه وحنينه عليك قوي 

الكلام ده بقوله بعد ما 

13/12/2012

اصر انه يفاجئني للمره التانيه 

جتلي فرصه

 من شهرين بس كنت بحلم بيها 

واتخيلها 

واقول ياه لو تجيلي الفرصه ده 

هتبقي ايه فل قوووي

دوات ومن غير مناسبه جتلي 

من غير مدور عليها ولا اطلبها ولا اتمناها 

بل علي العكس 

الفرصه ده خلتني ابكي 

واقول ليه دوات 

ليه الوقت ده ؟

اكيد ربنا بيدبر ليا خطه مدهشه 

فكرت كتير قوي اقبلها ولا ارفضها 

لو رفضتها هبقي غبيه وجبانه 

ولو قبلتها هتوجعني 

اللي حوليا كلهم قالوا انه لو مقبلتش ابقي غبيه 

انا كمان قررت انه مضيعش حتي انصاف الفرص من حياتي 

حتي لو مجتش زي مكنت بحلم بالظبط
دعيت دعاء الاستخاره 

وبابتسامه قبلتها 

ولو ده اللي ربنا عايزه يبقي اكيد له حكمه 

وعنده ليا خطه 

وانا مش هعاند 

لو كِملت هبقي مبسوطه وهستغلها 

ولو اتعطلت برضو هبقي مبسوطه 

عشان انا عندي ربنا 

بيوقف الكون ده كله وبيشغله عشاني انا 

نسرين

علي عكس كل توقعاتي 

13/12/2012 

اذهلني مرتين علي التوالي 

مره الساعه 10 الصبح 

والتانيه الساعه 7 بليل 

لكم أحمل قدر مختلف 

:)
14/12/2012

9:07 pm