عزيزي الفلانطين :D

إحم 

ايه المشكله يعني اني ابعت مسج للفلانتين ؟

ايه اللي مش طبيعي في الموضوع ؟

!!!

احم 

عزيزي الفلانتين 

يمكن انت متعرفنيش ... بس انا ياحبه عيني اعرفك كويس قوي 

اصل سعاتك رفعتلي ضغطي يجي ثلاث اربع مرات 

وجبتلي شلل رعاش مرتين ثلاثه 

واصابتني بالصداع تقريبا مش اقل من عشر مرات

عزيزي الفلانتين 

في الاول وقبل ما ابداء احب اصارحك بحاجه كدا بس متزعلش مني 

بص 

انا بصراحه كدا مش مقتنعه بيك 

وحاسه انه من العيب قوي انه يبقي فيه يوم للحب 

اصل انا من الناس اللي بيؤمنو بعقيده الحب 

فمن امتي كنا محتاجين سياتك عشان تفكرنا بعقائد جوانا 

عزيزي الفلانتين 

انا مش بلوم عليك انت ملكش ذنب 

مهو العيب اصلا مش عليك 

العيب علي الهبل اللي عملوك

بس بيني وبينك كدا ...  للاسف الناس بقت محتاجه يوم يفكرها بالحب 

مع انه المفروض اننا نعيش يومنا بالحب 

واللي يغيظ اكثر ان اليوم ده انحسر في شكل حب واحد 

علاقه بنت بولد 

طب قولي انت بذمتك اللي زي حلاتي في اليوم ده يعملوا ايه يعني ؟

يولعوا في نفسهم مثلا 

ولا ندور لنا علي حته تانيه لغايه ماسعاتك تشرف وتمشي 

عرفت ليه انا علي مشارف الاصابه بنوبه قلبيه سعاتك ؟

ومع ذلك وحط تحت اللي جاي ده ميت خط 

بص يااخ فلانتين 

انا ببعت لك السنه ده عشان اقترح عليك اقتراح 

متيجي نفتح صفحه جديده سوا 

وياابن الناس مش هتخسر حاجه 

 جرب ما يمكن انفع معاك

انا حلوه والله وهعجبك 

عارف بكره هوريك و هعيش يوم حب محصلش 

مع كل حاجه واي حاجه في وشي 

من الاخر كدا هحب علي نفسي 

:D 

مش قلت لك اني هعجبك 

عجبتك ها ؟ ها ؟

;D

طب خذ ده بقي 

بكره هدور علي حد نفسه يتحب وهحبه 

راجل كبير في الشارع ... ست عجوزه ... عيل غلبان

 اي حد هحبه واديله شيكولاته وهقوله كل عيد حب وانت طيب 

بكره هواتس اب للصبح مع كل الناس اللي عندي كلهم كلهم 

هحب في صحباتي واسلم علي كل اصحابي 

هفكر في كل الناس واتمني انهم يلاقوا حبه حب في اليوم ده

هساعد ماما في البيت وده طبعا قمه التضحيه مني وانت عارف 

:D 

عزيزي الفلانتين 

مش هستخبي في اليوم ده 

ومش هخاف اشوف كل واحد ماشي مع واحده وجايب لها ورد 

اصل الحب مش بالورد ولا باللبس الاحمر 

منتا عارف اللي فيها 

عزيزي الفلانتين 

اممممم

مش هكذب عليك برضو 

بصراحه كدا كان نفسي في ورد وشيكولاته 
اه عادي يعني منا بنت برضو 

بس صدقني مش زعلانه منك 

اصل انت ملكش ذنب يعني 

هو انت هتعمل ايه ولا ايه ياعيني 

:)

بص بقي من غير زعل كدا 

انا هستغلك 

وهطلب منك طلب 

منكن لو تقدر تخلي كل الناس اللي بحبها 

يحسوا بيك بكره 

يتبسطوا بيك بكره 

عشان خاطري والنبي 

:)

كمان انا عايزه اهدئ اهداء صغنن 

لــ خوخه (عروستي ) بندقه(عربيتي ) سوسن (كاميرتي ) اشرف _ موبايلي 

عايزه اقول لهم انا من غيركم اضيع 

واهداء اخير 

لجميع قاطني الكره الارضيه 

اغنيه منير 

ربك لما يريد 

خصوصا مقطع 

حب كأنك حلم معدي ... عيش  

ماتخليش ولا ثانية تعدي... عيش 

خدني لحضنك اروي حنينك 

واقسم حزنك بيني وبينك 

وارضى بكل اللى بيتقسم 

ده المكتوب مكتوب

نسرين 

اهلا فلانطين 

:D 

14/2/2013