انها ذلك السر الالهي للسعاده عندي
اكيد مش عشان جرعات الكافيين اللي بتمدني بيها
في الحقيقه انا معرفش ليه بتبسط لما بشربها او بفتكرها حتي
او لما حد بيقول قدامي كلمه موكا
!!!
يمكن هيا اسباب نفسويه عميقه داخل كينونتي اللي مش مفهومه
لكن المهم ان الشئ ده بيسبب ليا سعاده غير عاديه
الموكا مش بس بتسبب ليا السعاده
انما ليها مفعول السحر الغير مرئي
انها تخلي كائن ذي 56 كيلو بس زي حالاتي حاليا عايش وبيتنطط
الموكا لوحدها ليها مفعول بدات اقلق منه علي نفسي
فهيا بتدخلني في حاله من النشوه الغريبه
وتطلب معايا وقتها بقي زي ماتطلب
بعض الكوامن الداخليه منكن تتحرك وده اكثر وقت منكن اخاف منه علي نفسي
عشان الانسان ضعييييف
:)
الموكا لوحدها شئ قائم بذاته ومبني علي اسس متييين
الجميل بقي
"انه تم اكتشاف بعض "الاضافات
واللي منكن تضرب كميه السيراتونين في دمي للضعف وللضعفين كمان
:خذ عندك بقي
موكا سخنه مولعه في جو بيتكتك عظمك من البرد
والسما بتندع
...
...
ده بقي بتدي حاله مؤقته من العبط الذيذ
اللي يخليك تمشي في الشارع كالاتي
مبتسم بـــ بله لـــ ولا حاجه
منكن تنط لك نطتين ثلاثه كدا
سعات بتطلب انك تفتح ذراعك علي الاخر
وتقوم حاضن نفسك وتبرق زي الاهطل بالظبط
:D
:D
من الاضافات كمان انك تكون طالبها بنكهه البندق
و بتشربها وانت بتسمع منير
وهو بيقولك
هما الاثنين سوا"
الضحكه للشفايف
الشفه للموال
والزانه للخيييييال
اصل الولد شاعر
جواه عذاب واعر
مشواره للاخر
مر وكاس واعر "
الموكا بتتضرب برضو مع جرعات أمل وتفائل نمره
وفـ مره حاول تجربها كدا مع كتاب فارس النور لــ باولو كويلو
وهتبقي في عالم تاني
لو معاك مارسيل خليفه او اميمه الخليل او هما الاثنين بيغنوا لــ محمود درويش
الموكل سر عظيم
الموكا بتادي معايا في اي جو
وتطلب زي ماتطلب
لكن النتيجه الاكيده انها بتخليني في حاله من العبط
واللاوعي
والسعاده البلهاء
مش عارفه مدي صحه الكلام ده مع الكائنات العاقله
لكن انا كـ كائن بتموته في يومه ميت حاجه تافهه
وبتهمه تفاصيل الامور الصغيره
كائن بدور دايما عينه علي حاجه ترجعها
تكفيني الموكا عشان اكون في حاله من السعاده الغير مشروطه
وبناءه عليه فان الموكا تعتبر اداه لمكافئه نفسي دائما
زي النهارده
كافئت نفسي ثلاث مرات تقريبا
لمجرد اني قدرت اجتاز بجداره عاليه امتحان منيل
وبعيدا عن تتفيه القيمه الانسانيه والهبه الربانيه للبشر اللي زي حالتي
الا وهيا قيمه الموكا العظيمه
احب اقول انه من المفيد يكون عندك حجات عبيطه في حياتك بتخليك مبسوط
حجات بسيطه سهله
حجاتك الخاصه
فكل واحد يستحق قدر من السعاده في يومه
ولو مليميترات صغننه
تخليه يروح بعيد شويه
حر
عبيط
طفل
سعيد
ولا حاجه
عشان لما يرجع يقدر يكمل
وبالنسبالي الموكا هيا جرعه ولابد منها عشان اكون انا
ومعني ان فيه موكا واحنا في الشتا والدنيا بتمطر
يبقي ربنا بيطبط علي قلبي
اذا فالموكا هيا نقطه ضعفي العبيطه
ومش هقدر اقول لا
:)
Nesreen
10/11/2012
بعد تعاطي الموكا بجميع اضافاتها
3 comments:
ممكن موكا يانسرين؟
ممكن...
:$ :$
مش هنسى البوست ده ...
و الموكا
و التاكسي
كشري التحرير
مكتبة الديوان ...
ذكريات جميلة ... مع اجمل بنوتة في الدنيا
بقيت مدمن موكا الله يسامح اللى كان السبب بقاااااااااااااا
Post a Comment