الى منى

... عزيزتي منى

اكتب لك هذا في عام 2013 وبعد مرور 15 سنه علي اخر لقاء جمع بيننا

حببتي مني مش عارفه اذا كنتي فكراني ولا لا

؟؟؟

لكن انا هفترض انك لسه فاكره اي حاجه طشاش عني

واحب اقولك اني فاكره تقريبا كل حاجه عنك

حتي ده انا حلمت بيك من يومين

 وده علي وجه الخصوص اللي خلاني افكر اني اكتب لك الرساله ده

مني

لو كنت بتعدي من هنا او حد هيقولك علي الرساله ده

فانا البنت اللي كانت بتقعد جنبك في الفصل

ولمده الثلاث سنين الاولي لينا في المدرسه الابتدائيه

منى

بجد بفتقدك قوووي مش عارفه ليه

عايزه اقولك انه ماما فضلت تسالني عليك

معتقده انه للفيس بوك قوه سحريه منكن تخليني اقابلك تاني

مني انا بجد حاولت ادور عليك علي الفيس كتير

 بس للاسف موصلتش لحاجه لاني كل اللي اعرفه عنك  اسمك

وحجات مش منكن تفيد البحث علي الفيس بحاجه

عارفه يامني

انا كبرت قوي

 :)

اكيد انتي كمان كبرتي زي

بس للاسف مبقتش دكتوره جراحه زي مكنت بقولك

وللاسف الاكبر يامنى انه مكنش بسبب المجموع لكن بسبب قرار غبي مني

المهم يارب تكوني انتي بقيتي مهندسه معماريه زي ماكنتي بتتمني

عارفه انا كمان فاكره سندوشتات الانشون اللي كنتي بتصالحيني بيها

انا لسه بموووت في الانشون يامني

:)

وفاكره كمان اول خناقه بينا

في اول يوم للمدرسه

لما انا وصلت بعد الطابور وملقتش ليا مكان في الفصل

رحت شيلت شنطتك ورمتها علي الارض وحطيت شنتطي وقعدت

انتي يومها جبتيني من شعري

مش عارفه بصراحه يامني انت كنتي منفسنه من شعري قوي كدا ليه

:P

انا يومها خذت بالي علي فكره

ويومها نديتك باكثر اسم بيغيظك
"

:D

ومن يومها وانا مش بنديك غير بالاسم ده

يارب تكوني افتكرتيني بقي

انا كمان فاكره لما كنا نحب نلعب بالفرشات في حوش المدرسه

ونتسابق مين هتجمع عدد اكبر من الفراشات

انا كمان فاكره ازي بطلنا اللعبه المنيله ده

بعد ماقرصتني نحله كبيره مسكتها بدل الفراشه

وسخنت بسببها يومين في البيت

علي فكره كمان انا لسه باعشق الفراشات والوانها واشكلها زي زمان

فاكره انت وانا كنا المصرين الوحدين في الفصل

او في المدرسه كلها تقريبا

فاكره لما كانت البنات يضيقوني

وانت تضربيهم

:D

انا كمان فاكره قووي قووي دكه الصراحه بتاعتنا

المكان اللي اتفقنا انه اللي يتقال فيه

اولا يبقي حقيقي

وثانيا يعتبر سر ومدفون في بير

انا فاكره الايام اللي كنت بسحبك من ايدك في الفسحه علي دكه الصراحه

واقعد احكيلك عن خنقات بابا وماما

واقعد اعيط

فاكره حضنك يامني ليا

وازي كنتي بتلعبي في شعري

مع اني مكنتش اطيق حد يحط ايده علي شعري

عارفه

بابا وماما بطلو الخنقات اللي كنت بحكهالك يامني

عشان الخنقات كبرت اكتر منهم قوي

فقرروا يعيشوا بشكل جديد

لو قابلتك هحكيلك عشان تخذيني في حضنك

وهسيبك تحطي ايدك علي شعري

مع اني لسه مش بطيق حد يحط ايده علي شعري

:)

وعلي فكره انا بقيت محجبه الحمد لله

عارفه كمان

انا لسه فاكره الكلام اللي كنا بنقوله لبعض

بس انا لسه متجوزتش يا مني وشكلي كدا مش هعملها

بس اوعدك لو ربنا اراد وابتلى ابن الحلال بيا

لـ اخليه يحب عيالنا ويقعد معاهم كتير

مش هخليه الممول المالي بتاع الاسره وبس

:)

عارفه انا متاكده انك اتجوزتي وخلفتي مش عارفه ليه

بس حاسه انه عندك بنوته في بياضك وطيبه قلبك

يارب تكون شبهك بس بلاش والنبي شعرك

:D

مني

الدنيا كبرت قووي

وبقت مكعبله في بعضها

وكله بينفذ علي كله

لدرجه اني مبقتش عارفه فين اولها من اخرها

فاكره المخبز اللي كنت بشتكيلك من بعده و ان ماما بتغصب عليا اروح اجيب العيش منه

اهو طول بعده بقي اقصر حاجه في دنيتي

ولو ماما طلبت مني اجبلها عيش منه تاني هتنطط من الفرح

كل حاجه كبرت واتغيرت يامني

عايزه بقي اقولك  علي حاجه انت هتسمعيها اول مره مني

اليوم اللي مشيتي فيه

فكرتك غايبه من المدرسه

وتاني يوم لما جابو واحده تقعد جنبي

اتخانقت عشانك

بس المس قالت يومها انك خلاص مش هتيجي تاني

وانك نقلتي مدرسه تانيه

انا معرفش ليه مقلتليش

انا متاكده انك كنتي تعرفي

بس زي عوايدك مكنتيش بتحكي الحجات الوحشه الا قليل قوي

عارفه كملت الثلاث سنين اللي فاضلين في ابتدائي من غير صحاب ليا

وكنت بروح كل ماابقي مضايقه علي دكه الصراحه

واتكلم معاكي واعيط

كان كتير قوي زي دوات بيبقي نفسي في حضنك

وايدك علي شعري

الاء المصريه ولينا اللبنانيه ودولت السودانيه كلهم فضلوا يسالوني عنك

وانا ملقتش حد اسئله

رحتي فين وليه مقلتليش

منى

اقسم بالله العظيم لو اعرف لك مكان دوات حتي لو كان في الصعيد

لاقطع تذكره من بكره واجيلك

بس تاخذيني في حضنك زي زمان

نفسي بجد اشوفك

عشان انت وحشتيني وانا عمري منسيتك

ودايما بتكلم مع ماما عنك كتير

يارب رسالتي توصلك

بحبك قوي يااجمل صاحبه في الدنيا

نسرين

اللي كانت جنبك في اولي وثانيه وثالثه / أ

مدرسه الثامنه عشر الابتدائيه

وحشتيني

:)

23/1/2013